Velg en side
Mandagsklubben med daglige gleder, opplevingar, framdrift og thruster som stikkord for kvelden

Mandagsklubben med daglige gleder, opplevingar, framdrift og thruster som stikkord for kvelden

jan 6, 2025

Stikkord for årets første Mandagsklubb 27. januar er daglige gleder, opplevingar og maritim framdrift- og thrustersystem. Etter foredraga blir det kveldsmat og den gode praten rundt borda som alltid.

High-end opplevingar for næringslivet!
Gro Linn Gamst er frå Brattvåg, og er gründer av reiselivsselskapet Nordfolk Travel i Ålesund. Selskapet har raskt blitt anerkjend i det internasjonale luksussegmentet, og har no fem tilsette der sist tilsett har base i London. Alle har som oppgåve å skreddarsy opplevingar for kvalitetsbevisste kundar verda over. Vi får vite meir om korleis dette blei en suksess, og kanskje får vi også nokon gode idear til korleis opplevingar kan vere ein del av B2B-verksemd?

Moldebedrift feirar rekordar!
Selskapet Brunvoll, ein global aktør innan maritim framdrift og thrustersystem, opplever ein formidabel vekst. Vi får presentasjon av denne suksesshistoria, også med døme på kundeprosjekt i Herøy, frå Oddbjørn Føslvik, VP Sales i Brunvoll Volda.

Har du lyst til å bli ein enda betre daglig gleder?
Heidi Klefstad er ein profesjonell gledesspreiar. Ho snakkar om det å gjere kvarandre gode, om å bli sett og korleis vi alle kan bidra til å skape eit godt arbeidsmiljø. Om å spreie arbeidsglede og om å leie med hjartet. Har du det godt med deg sjølv, yter du også best i jobbsamanheng og har mest å gi til dine medmenneske. Ditt gode humør og dine oppbyggjande kommentarar løftar menneska rundt deg, og på den måten kan glede og pågangsmot spreie seg som ringar i vatn. Foredraget har eit kvardagsfilosofisk utgangspunkt der Heidi snakkar om korleis vi med enkle grep kan skape ein betre kvardag for oss sjølve og våre omgjevnader.

Lenke til påmelding (Google docs) – Påmelding til Mandagsklubben 27. januar

Frist fredag 24. januar kl. 13 for antall til kveldsmaten.
Del gjerne invitasjonen med dine kollegaer i medlemsbedriften!

Vel møtt!

Helsing Fosnavåg Shippingklubb

 

Julehelsing

Julehelsing

des 12, 2024

Vi takkar så mykje for i år, og for deltaking på våre arrangement. Vi ser fram til neste år med nettverksbygging, kompetanseheving og dei gode samtalane!

For 2025 ber vi deg sette av følgande datoar:

Mandagsklubb 27. januar kl.18
Mandagsklubb 24. mars kl.18
Årsmøte og mandagsklubb 26. mai kl.18
Fosnavågkonferansen torsdag 19. juni kl.10-17 med kveldsarrangement (program er under utarbeiding)

Med god julehelsing frå styret og dagleg leiar

Stig Remøy er årets æresmedlem

Stig Remøy er årets æresmedlem

nov 26, 2024

Stig Remøy er årets æresmedlem. Heideren vart utdelt på juleavslutninga til Fosnavåg Shippingklubb 25. november.

Fosnavåg Shippingklubb har sidan 2007 delt ut heideren «Årets æresmedlem». Prisen har gått til personar som har hatt eit langvarig engasjement for den maritime bransjen, har påverka bransjen positivt og vore bidragsytarar til lokalsamfunnet. President i Fosnavåg Shippingklubb, Helge T. Remøy, kunne trygt slå fast at årets æresmedlem på alle måtar er ein verdig mottakar av denne æra og heldt følgande tale til kveldens hovudperson:

Kjære medlemmer og  gjestar  

Det er med stor glede eg står her i dag for å gi ei velfortent anerkjenning til ein person som har betydd mykje for Fosnavåg og for den maritime næringa her på Sunnmøre. Personen har gjennom sitt arbeid sett sitt preg på både næringslivet og samfunnet vårt. 

Eitt av måla til Fosnavåg Shippingklubb er å fremje Fosnavåg som ein leiande maritim by. Denne personen sitt arbeid og innsats har vore avgjerande for å styrke denne posisjonen. Gjennom innovasjon og vilje til å satse har han bidrege til å sikre ei positiv utvikling av den maritime næringa i kommunen vår. Årets æresmedlem er Stig Remøy. 

Stig starta karrieren sin til sjøs allereie som 15-åring og la tidleg grunnlaget for ei livsgjerning som har vore prega av innsats, visjon og handlekraft. Saman med brørne sine kjøpte han sin første fiskebåt som 19-åring og fekk ansvar som skipper allereie som 21-åring. Fiskerisatsinga la grunnlaget for det som vi i dag kjenner som Olympic Group. Gjennom dette konsernet har han bidrege til å skape arbeidsplassar, vekst og innovasjon. Stig har vist at det går an å lykkast på den globale maritime scena, utan å gløyme røtene sine her i Herøy. Sikkerheit og bærekraft har vore i høgsetet og Olympic har vore i front i bransjen gjennom banebrytande og nyskapande prosjekt. Fleire prisar har blitt tildelt og med det sett Olympic og vesle Fosnavåg på kartet både nasjonalt og internasjonalt. Tidlegare i år fekk Olympic prisen «Safety Award 2024» under OSJ-konferansen i London, og nyleg vart dei også nominerte til prisen «Safety Project of the Year» av den globale maritime organisasjonen IMCA. Vinnaren vert kåra neste veke, vi ventar i spenning saman med dokke. 

Det som gjer Stig si historie ekstra verd å trekke fram, er korleis han også har brukt ressursane sine til å støtte lokalsamfunnet. Ikkje minst som pådrivar og medeigar i bygget vi held til i no i kveld, Thon Hotel Fosnavåg. Gjennom store bidrag til prosjekt som Fosnavåg Konserthus, Sunnmørsbadet og Olympic Kulturfond har han vore med på å løfte kultur, trivsel og aktivitet for oss som bur i regionen. Slike tiltak er viktige for å skape ein god plass å bu og eit sterkt fellesskap, noko vi alle set pris på. Stig har med dette vist oss at suksess ikkje berre handlar om å skape verdiar, men òg om å gi tilbake – om å styrke fellesskapet og legge grunnlaget for ei framtid som er rik på både moglegheiter og opplevingar. 

Stig, du har gjennom ei livslang karriere vist kva det vil seie å vere ein ekte kystens mann. Du starta som sjømann, og det var til havs du fann både retninga og grunnlaget for det som skulle bli ei eksepsjonell livsgjerning innan fiskeri, skipsfart og forretningsliv. Gjennom Olympic Group har du ikkje berre bygd opp eit internasjonalt leiande selskap – du har òg vore ein sterk pådrivar for å setje Fosnavåg på kartet som ein maritim hovudstad. Med ditt arbeid har du vore ein viktig ressurs for Fosnavåg og Herøy, både som næringslivsleiar og som samfunnsbyggjar. På vegner av styret og medlemmene i Fosnavåg Shippingklubb er det ei glede å gi deg æresmedlemskap som takk for innsatsen din. 

Gratulerer, og takk for det du har gjort – og framleis gjer – for byen vår og for den maritime næringa!

Juleavslutning 25. november

Juleavslutning 25. november

nov 6, 2024

🌟 Mandag 25. november kl. 18 inviterer vi medlemmane våre til juleavslutning i Fosnavåg Konserthus i samarbeid med Sparebanken Møre.
Vi byd på tre rettars middag, underhaldning og utdeling av æresmedlemskap.
Som tilsett i medlemsbedrift kan du melde deg på HER
Mandagsklubb 21. oktober

Mandagsklubb 21. oktober

sep 10, 2024

Denne gongen flyttar vi oss til Horisont som ligg i Fosnavåg Næringspark på Mjølstadneset.
På menyen står det kvit bacalao og temaet er «Rekruttering i ein stram arbeidsmarknad».

  • Eit team frå NAV Møre og Romsdal og NAV Herøy og Vanylven kjem for å fortelje om samarbeidsprosjektet dei inviterer næringslivet til. Målet med samarbeidet er å imøtekome behova bedriftene har for arbeidskraft gjennom ein kostnadseffektiv rekrutterings- og opplæringsprosess, der ein saman med bedriftene kvalifiserer dei tilgjengelege arbeidskraftressursane som finst lokalt.
  • CEO Kariann Sandvik frå rekrutteringsbyrået Yapril vil gi oss innblikk i trendar i kandidatmarknaden, suksesskriterier for å tilsette for lange relasjonar og dele tankar om korleis ein kan sikre kompetanse og ressursar i ein stadig meir krevjande marknad.
  • Trine E. Hofseth Helgå kjem frå Næringsforeningen Ålesundregionen der ho er prosjektleiar for prosjektet «Bli med hit». Saman med næringsforeningane i Molde og Kristiansund har dei saman med lokale bedrifter hatt mange jobbmesser i Oslo og Trondheim for å marknadsføre mulegheitene i vår region. Vi får høyre kva erfaringar dei har gjort seg og kva resultat prosjektet har gitt så langt. Dei er klar for neste jobbmesse i Trondheim 21. november. Kanskje di bedrift vil vere med?
  • Frank-Levi Kvalsund er CHRO i HAV Group og vi får høyre korleis dei jobbar med rekruttering for å tiltrekke seg framtidig arbeidskraft, blant anna ved å skilje seg ut i korleis dei viser seg fram for potensielle framtidige arbeidstakarar. Saman med Havila, Rem Offshore, Olympic Subsea, Havila Kystruten, Metizoft og Metizport inviterte dei 50 studentar ved NTNU Trondheim hit i staden for å ta turen dit.
  • Prosjektleiar i «Spring Trainee» Frida Eirin Voldnes kjem for å presentere prosjektet som Ulstein Næringsforum, saman med alle næringsforeiningane på Søre Sunnmøre samarbeider om. Spring Trainee er ei plattform for å matche unge, kunnskapsrike og motiverte nyutdanna med Søre Sunnmøres mest innovative og framtidsretta bedrifter og meir enn 50 personar har meldt si interesse til å bli trainee gjennom prosjektet.

Påmelding HER innan fredag 18. oktober kl. 13

Rederiskatteordninga og EU / ETS på mandagklubben 9. september

Rederiskatteordninga og EU / ETS på mandagklubben 9. september

aug 23, 2024

Vi får besøk frå både Bergen og Europa til haustens første mandagsklubb.

Voldingen Tormod Torvanger arbeider hovedsakeleg med skatterettslege spørsmål, dels som skattepartnar i advokatfirmaet Rasmussen & Broch DA og dels som førsteamanuensis ved Norges Handelshøyskole (NHH). Som advokat bistår han innehavarar og eigarar av næringsverksemder, samt interesseorganisasjonar og offentlege organisasjonar, med rådgiving og tvistesaker knytta til skatterettslege spørsmål. I 2020 publiserte han ei doktoravhandling om den norske rederiskatteordninga.

Ålesundaren Marina Tomren tek turen heilt frå Amsterdam for å gi oss ein introduksjon om EU sitt kvotehandelssystem for utslepp (EU/ETS – Emission Trading System). Marina har ein bachelor i Shipping Management frå NTNU Ålesund og jobbar som Emission Trader hos ACT Commodities i Nederland. Ho har kjennskap til marknaden for kvotekjøp og kan mellom anna forklare prisdrivarane i denne marknaden.Skip vil gradvis påleggast EU sitt ETS-regelverk – dei største og første allereie no frå august  2024. Det er med andre ord eit brennaktuelt tema.

Påmelding HER innan 6. september kl. 13